قالك مرة فى واحد أدم سبايدر مان ,
المهم ها الادم كان معجب بـحواء ,
لكن حواء كانت مش مدورته ,
في يوم من الايام كان أدم يقوم بجولته العنكبوتية المعتادة فى المدينة ,
جو متع انا بطل و مش عارف شني
صدفة و بلا حس عنكبوتي سمع حواء تعيط ,
مشي بشوية يشوف شن فيه ,
لقي حواء تتعارك مع صاحبها
المهم هو قعد لابد وراء سطل الكناسة خايف من صاحب حواء
و بعدها , حواء مروحة للحوش , قرر أدم انه يستغل الفرصة و يقول لها خير ,
المهم قعد يتبع فيها , و يقول اهو توا منمشي نقولها خير , اهو توا ,,
المهم و هو قاعد يكلم في روحه لقي حواء الى يتبع فيها
مش هي حواء المعجب بيها
وبعد مرور عدة أيام
حواء صارلها حادث ,
ايه هذه فرصة أدم يمشي يزورها , مشي كلم امه و قالها منشوا نزوروا حواء مدايرة حادث
فى المستشفى اطمنوا على حواء , و ادم شادها كل شوية يقول " كيف حالك توا يا حواء "
و حواء ترد باهية يا أدم ,
بالك سألها عشرة مرات فى مدة لا تتجاوز الاربع دقايق
هذا غير على اساس سبايدر مان ,,
و بعدها ام أدم قالت منشي نزور حوحة جارتي حتا هي راقد هنا ,
أدم تزرط , قال لأمه توا نمشوا نشوفها بعدين ,
قالتله خليك انتا معا صاحبتك و توا نرجع
أدم : تحشم هلبا
لا يا أمي هذه مش صاحبتي , قصدي مش , و فاتته امه و خلاته
ادم قعدوجه طماطمي اللون
شن منقول شن مندير ,
حواء ورقت للوضع , وقالت خلي نهدرز انا بالك الولد تنحل عقدته ,
قالته أدم كيف حالك ؟
قالها باهية يا حواء ,
قصدي باهي يا حواء
أدم سمعت انه سبايدر مان صاحبك
أدم ارتفعت معنويات الى الحضيض , ماهو كانت تحت الحضيض بهلبا
قالها ايه , و هو ديما يسلم عليك , لكن أنتي عارفة انا ما نشوفش فيك إلا مع اذاك البرميل المصحباته , وانتي عارف اني انا شخص ما نحبش المشاكل
حواء : باهي هو كيف نظرته ليا , ما يتكلمش عليا ؟
أدم باش ما يفلقش الوضع و يخليها تتعلق بسبايدر مان ,
قال لا هو بس يسلم عليك لما نبدا نتكلم عليك أنا ,
حواء ترد و هي يأسة من الحياة , و انتي شن تقول عليا ,,
بما انا ادم ما يسقمش يتحمل الضغط , طلع السايدك الي في دماغه " سايدك اسمه البوكيمون المتصدع ديما الى عند ميستي "
قالها
إنتي زينة أم خشوم كبار.. تقول مطار.. معبي طيارات كثار
و كيف بيكمل تجيه طاسة على راسه
يفقد عمك ادم الوعي لمدة تناهز الثواني العشر ,
يعنى كان الطاسة فاضية راهو ما ناضش بكل ,
لكن ربك ستر و جت فيها شوية مية
و بعد الفشخة هذه ادم استرجع الحالة الطبيعية و سيطر على السايدك ,
قالها انا قصدى منقولك :-
لما نشوفك لعيونك يا حوة , و انتي تشوفي لعيوني " تي غير امتا شافت لعيونك يا كداب " نحس بأن الدنيا مش دنيا " على اساس " لأني نحس أني قوي " القوة بالله " و ضعيف فى نفس الوقت " انت امتا ما كنتش ضعيف " نحس بروحي مفعم بالحيوية " حيوية النوم امالا " و فى نفس الوقت خايف " الحمد لله قلت حاجة حق " نحس اني وصلت المحال , لكن مش مستعد له ,
حواء : مصدومة !!!
ادم انتا من وين تجيب فيه الكلام هذا ؟
ادم بلقطة العباطة المشهورة , و حكة الجهة اليمنى من الراس باليد اليسرى مستعملا اصبعه السبابة فقط , ,
قالها من فلم سبايد مان الجزر الاول ,
بعدها الدنيا ظلام عند أدم ,
المسكين لحقت له المالقي على وجه ,,
و تستمر معاناة أدم و حواء الى ان يتخلص ادم من مهام سبايدر مان ,
على أساس هو سبايدر مان حق
و أدم قاعد يطمن في روحه بمقولة عمه الشهيرة ,,
كل ما زادت قوتك , زادت مسؤليتك ,
ليست هناك تعليقات:
إرسال تعليق